ДАДАТАК № 1
да Статута Прэміі
імя Міхала Анемпадыстава
1. Прэмія прысуджаецца аўтару або камандзе аўтараў за найлепшую вокладку беларускай кнігі, выдадзенай у 2024 годзе.
2. Мэты Прэміі:
- вызначэнне найлепшых вокладак беларускіх кніг;
- падтрымка дызайнераў беларускай кнігі;
- ушанаванне памяці выбітнага дзеяча беларускай культуры Міхала Анемпадыстава (1964–2018).
3. Да ўдзелу можна заяўляць вокладкі беларускіх кніг. Беларускай лічыцца кніга, якая адпавядае як мінімум 2 (двум) з пералічаных ніжэй крытэрыяў:
- выдадзена ў беларускім выдавецтве;
- напісана беларускім аўтарам;
- напісана па-беларуску;
- змест звязаны з Беларуссю або яе культурай.
У спрэчных сітуацыях адпаведнасць намінаванай кнігі панятку «беларуская кніга» для кожнага канкрэтнага выпадку вызначаецца сябрамі Журы большасцю галасоў.
4. Кніга, якая намінуецца на конкурс Прэміі, мусіць быць выдадзена ў папяровым выглядзе ў прамежку часу паміж 1 студзеня і 31 снежня каляндарнага года, за які быў абвешчаны конкурс Прэміі. Калі кніга была выдадзена ў годзе, што папярэднічаў году, за які быў абвешчаны конкурс Прэміі, але з абгрунтаваных прычын не мела магчымасці ўдзельнічаць у папярэднім конкурсе Прэміі, яна можа быць прынята са згоды Аргкамітэта для ўдзелу ў бягучым годзе.
5. Для ўдзелу ў конкурсе Прэміі адсутнічаюць абмежаванні для аўтараў вокладак паводле ўзросту, грамадзянства, месца жыхарства і месца публікацыі твораў. Намінуюцца кнігі жывых аўтараў вокладак.
6. Конкурс Прэміі складаецца з наступных этапаў:
I этап: прыём заявак Аргкамітэтам на конкурс Прэміі;
II этап: публічнае абвяшчэнне Поўнага спіса вокладак кніг, прынятых да ўдзелу ў конкурсе Прэміі;
III этап (апцыянальна): публічнае абвяшчэнне Доўгага спіса вокладак-намінантак конкурсу Прэміі;
IV этап: публічнае абвяшчэнне Кароткага спіса вокладак-фіналістак конкурсу Прэміі;
V этап: абвяшчэнне і ўрачыстая цырымонія ўзнагароджання лаўрэата/лаўрэатаў Прэміі.
7. Галоўнай узнагародай у конкурсе Прэміі з’яўляецца артэфакт.
У выпадку вылучэння дадатковых намінацый згодна з п. 2.8 Статута пераможца дадатковай намінацыі атрымлівае дыплом або іншы прыз, вызначаны Аргкамітэтам.
8. З удзелу ў конкурсе Прэміі выключаюцца кнігі і вокладкі, аўтарамі ці суаўтарамі якіх з’яўляюцца сябры Журы, Каардынатар Прэміі і/ці асобы, якія маюць дачыненне да падліку галасоў, а таксама асобы, якія маюць дачыненне да кантрольна-рэвізійных органаў арганізатараў.
9. Лаўрэаты Прэміі могуць удзельнічаць у якасці намінантаў у наступных сезонах Прэміі.
10. Вокладка, заяўленая да ўдзелу ў конкурсе Прэміі, выключаецца з удзелу, калі адсутнічае згода аўтара вокладкі на ўдзел у Прэміі. Калі вокладка мае некалькі аўтараў і іх жаданні адносна ўдзелу/няўдзелу ў конкурсе Прэміі разыходзяцца, вокладка выключаецца з удзелу.
11. У конкурсе можа ўдзельнічаць любая колькасць вокладак аднаго аўтара.
12. Рашэннем Аргкамітэта дзеля бяспекі назва кнігі і імя аўтара могуць быць зашыфраваны.
13. Заяўка на Прэмію мусіць утрымліваць наступныя звесткі і матэрыялы:
- Назва кнігі;
- Аўтар/аўтары кнігі;
- Аўтар/аўтары вокладкі;
- Кантактныя дадзеныя ўсіх аўтараў вокладкі, кароткая інфармацыя пра аўтара (аўтараў, у такім выпадку – пра ступень іх удзелу ў стварэнні вокладкі);
- Год выдання;
- Месца выдання;
- Выдавецтва;
- ISBN;
- Мова кнігі, якая намінуецца;
- Выява вокладкі кнігі ў электронным фармаце (jpeg, png ці pdf) – пярэдні бок і разварот цалкам, а таксама іншыя элементы афармлення кнігі, якія намінатар лічыць важнымі для разгляду Журы (напр., форзацы);
- Згода на перадачу папяровай версіі кнігі ў выпадку абрання ў кароткі спіс;
- Дадзеныя заяўніка;
- Згода з палажэннямі Рэгламенту;
- Інфармацыя пра згоду аўтара на ўдзел у Прэміі і на публічнасць, згода на апрацоўку персанальных дадзеных.
14. Заяўкі на конкурс Прэміі неабходна дасылаць:
а) праз гугл-форму, спасылка на якую будзе змешчана ў інфармацыі пра абвяшчэнне Прэміі;
б) электронныя выявы вокладак мусяць быць дасланы на e-mail [email protected] з пазнакай у тэме ліста назвы кнігі, імя і прозвішча аўтара вокладкі;
в) папяровы асобнік перадаецца ў індывідуальным парадку, пра што намінатару будзе паведамлена асобна.
15. Усе этапы Прэміі, у тым ліку абвяшчэнне Поўнага, Доўгага (апцыянальна), Кароткага спісаў і лаўрэатаў, будуць асвятляцца ў сацыяльных сетках Беларускага ПЭНа @pen_belarus і на сайце /.
16. Падаючы заяўку на конкурс Прэміі, удзельнікі прызнаюць, што Аргкамітэт Прэміі Анемпадыстава пакідае за сабой права выкарыстоўваць прынятыя на конкурс творы:
- для іх дэманстрацыі ў публікацыях, звязаных з конкурсам, на афіцыйным сайце і сацсетках Прэміі, у сродках масавай інфармацыі;
- на сайтах і ў сацсетках партнёраў, у любых рэдакцыйных артыкулах;
- у рэкламных мэтах для прасоўвання конкурсу Прэміі і падзей, звязаных з Прэміяй, без якіх-кольвек абмежаванняў.
17. Падаючы заяўку, удзельнікі гарантуюць, што яны з’яўляюцца ўладальнікамі ўсіх правоў на свае працы і/або маюць неабходныя правы для дазволу на іх выкарыстанне, публікацыю і паказ, а таксама для перадачы правоў, апісаных вышэй. Удзельнікі пацвярджаюць, што пададзеныя імі працы не парушаюць аўтарскіх правоў або правоў на таварныя знакі іншых асоб ці арганізацый.