Людзі слова ў няволі (33)
Людзі Слова – беларускія літаратары, перакладчыкі і даследчыкі літаратуры, публіцысты, інтэлектуалы і тыя, хто стварае і пашырае культуру, бароніць слова і яго майстроў.
Місія Беларускага ПЭНа – будаваць прастору для развіцця культуры, дыялогу і творчасці, бараніць грамадзянскія і культурныя правы і свабоды Людзей Слова.
З 1996 года Беларускі ПЭН з’яўляецца сябрам камітэта «Пісьменнікі ў зняволенні», заснаванага ў 1960 годзе Асамблеяй дэлегатаў Міжнароднага ПЭНа. Камітэт давялося стварыць, бо ўлады ва ўсім свеце ўсё часцей спрабуюць абмежаваць свабоду пісьменнікаў і журналістаў, прымусіць іх маўчаць.
Беларускі ПЭН працягвае змагацца супраць праяў нянавісці і прыцягвае сусветную ўвагу да парушэння правоў чалавека ў Беларусі, у тым ліку – культурных правоў. У час крызісу і няпэўнасці Беларускі ПЭН, у адказ на спробы рэжыму раз’яднаць грамадства, заклікае Людзей Слова да адзінства і дыялогу.
Станам на 11 верасня 2025 года Людзей Слова ў няволі (у тым ліку з абмежаваннем волі – на «хатняй хіміі») – не менш за 33, дзеячаў культуры ў няволі (у тым ліку з абмежаваннем волі – на «хатняй хіміі») – не менш за 154. Непасрэдна палітзняволеных дзеячаў культуры – каля 8 % ад усёй колькасці палітзняволеных.
Дзеячы культуры, якіх пераследуюць паводле палітычных матываў, зазнаюць жорсткае і бесчалавечнае абыходжанне, трапляюць у стан паслядоўных абмежаванняў, ціску, застаюцца без сувязі з сям’ёй і адвакатамі. Часта сваякі месяцамі не маюць аніякіх звестак ад іх.
Прадстаўлена 31 біяграфія з 33. Дзве гісторыі не апублікаваныя з прычыны пажадання сваякоў зняволеных аб непублічнасці ў мэтах бяспекі.